Das Nibelungenlied - Auenture von den Nibelungen

Uns ist in alten mæren wnders vil geseit
von heleden lobebæren von grozer arebeit
von frevde vñ hochgeciten von weinen vñ klagen
von kvner recken striten mvget ir nv wnder horen sagen
Ez whs in Bvregonden ein vil edel magedin
daz in allen landen niht schoners mohte sin
Chriemhilt geheizen div wart ein schone wip
darvmbe mvsin degene vil verliesen den lip
Ir pflagen dri kunige edel uñ rich
Gunther uñ Gernot die rechen lobelich
vñ Giselher der iunge ein wetlicher degen
div frowe was ir swester die helde hetens in ir pflegen
Die herren waren milte von arde hoh erborn
mit kraft vñ mazen chvne die rechen vzerchorn
da zen Bvrgonden so was ir lant genant
si frvmten starchiv wnder sit in Etzelen lant
Ze Wormze bi dem Rine si wonten mit ir chraft
in dienten von ir landen vil stolziv ritterschaft
mit lobelichen eren vnz an ir endes zit
si sturben iæmerliche sit von zweier frowen nit
Ein richiv chuniginne frov Vte ir mvter hiez
ir vater der hiez Dancrât der in div erbe liez
sit nach sime lebene ein ellens richer man
der ovch in siner iugende grozer eren vil gewan
Die dri kunige waren als ich gesaget han
von vil hohem ellen in waren vndertan
ovch die besten rechen von den man hat gesaget
starch vñ vil chvene in scharpfen striten vnverzaget
Daz was von Tronege Hagene vñ ovoch der bruder sin
Danchwart der snelle von Metzzen Ortwin
die zwene marcgrauen Gere vñ Ekkewart
Volker von Alzeye mit ganzem ellen wol bewart
Rvoomolt der chvchenmeister ein vz erwelter degen
Sindolt vñ Hvnolt dise herren mvsin pflegen
des hoves vñ der eren der drier kunige man
si heten noch manigen rechen des ich genennen nienen kan
Danchwart der was marschalch do was der nefe sin
trvhsetze des kuniges von Mezzen Ortwin
Sindolt der was schenche ein wetlicher degen
Hvnolt was chame[iv]rære si chunden hoher eren pflegen
Von des hofes ere vñ von ir witen chraft
von ir vil hohen werdekeit vñ von ir ritterschaft
der die herren pflagen mit frevden al ir leben
des enchunde iv ze ware niemen gar ein ende geben.

In disen hohen eren trvmte Chriemilde
wie si zvge einen valchen starch schon vñ wilde
den ir zwene arn erchrvmmen daz si daz mvste sehen
ir enkunde in dirre werlde leider nimmer geschehen
Den trvom si do sagete ir mvoter voten
sine chundes niht beschaiden baz der gvten
der valche den dv zivhest daz ist ein edel man
in welle got behvten dv mvst in schier vloren han
Waz saget ir mir von manne vil liebiv mvter min?
ane rechen minne so wil ich immer sin
svs schon ich wil beliben vnz an minen tot
daz ich von rechen minne sol gewinnen nimmer not
Nvne versprich ez niht ze sere sprach ir mvter do
soltv immer hercenliche zer werlde werden vro
daz chvmt von mannes minne dv wirst ein schone wip
ob dir got gefuget eins rehte gvten ritters lip
Die rede lat beliben vil liebiv frowe min
ez ist an manigen wiben vil diche worden schin
wie liebe mit leide ze iungest lonen chan
ich sol si miden beide sone chan mir nimmer missegan

Chriemhilt in ir mvte sich minne gar bewach
sit lebete div uil gvte vil manigen lieben tac
daz sine wesse niemen den minnen wolde ir lip
sit wart si mit eren eines vil werden rechen wip
Der was der selbe valche den si in ir trvome sach
den ir beschiet ir mvoter wie sere si daz rach
an ir nehsten magen die in slvgen sint!
durch sin eines sterben starp vil manich mvoter kint

Text taken from: Bibliotheca Augustana.